ભુજ શહેરમાં આવેલી એક ખાનગી હોટલમાં કામ કરતા ત્રણેક પરપ્રાંતિય કર્મચારીઓમાં કોરોના વાયરસ જેવા લક્ષણો દેખાતા આરોગ્ય તંત્રમાં દોડધામ મચી ગઈ છે. બીજી તરફ સંવેદનશીલ એવી આ બાબતે ખાનગી રાહે તકેદારીના તમામ પગલા લેવાઈ રહ્યા છે. જો કે આ ત્રણેય કેસો શંકાસ્પદ છે, તેના રિપોર્ટ નેગેટીવ પણ હોઈ શકે છે. આ અંગેની મળતી વિગતો અનુસાર ભુજ શહેરના એરપોર્ટ રીંગ રોડ પર આવેલી એક મોટી ખાનગી હોટલમાં ઘણાબધા પરપ્રાંતિક કર્મચારીઓ કામ કરી રહ્યા છે. આ પૈકી ત્રણેક કામદારોમાં કોરોના વાયરસ જેવા લક્ષણો દેખાતા મેનેજમેન્ટ દ્વારા ત્રણેય કર્મચારીઓને સ્થાનિક હોસ્પિટલમાં સારવાર માટે ખસેડવામાં આવ્યા હતા. પ્રાથમિક સારવાર બાદ આ તમામને વધુ સારવાર માટે અમદાવાદ ખાતે ખસેડવામાં આવ્યા હોવાનું સૂત્રોએ જણાવ્યું છે. બીજી તરફ આરોગ્ય વિભાગે પણ ખાનગી રાહે તકેદારીના પગલા લેવાનું ચાલું કરી દીધું છે.
