કચ્છના મહેમાન બનેલા ગુજરાત રાજ્યના રાજ્યપાલ આચાર્ય દેવવ્રતે સમગ્ર દુનિયામાં ખ્યાતનામ ધોરડો સ્થિત સફેદ રણનો સૂર્યાસ્ત નીહાળવાનો લ્હાવો લીધો હતો. આ પહેલા ટેન્ટ સિટીમાં આવેલ ક્રાફ્ટ બજારની મુલાકાત લઇ કચ્છના સ્થાનિક કલા કારીગરો સાથે વાતચીત કરી કચ્છી કળા અને વણાટ અંગેની ઝીણવટભરી માહિતી મેળવી હતી. ક્રાફ્ટ બજારની મુલાકાત દરમિયાન રાજ્યપાલે ક્રાફ્ટ બજારના વેચાણકારો પાસેથી કચ્છી શાલ તેમજ કચ્છી ભરત અંગે જાણકારી મેળવી હતી.ક્રાફ્ટ બજારની મુલાકાત દરમિયાન રાજ્યપાલે તેમના ધર્મપત્ની સાથે કચ્છી શાલ અન્ય વસ્તુઓ ખરીદી હતી. ખરીદી દરમિયાન કારીગરો સાથે વાતચીત કરી કચ્છમાં સ્થાનિક રોજગારી અંગે ચાલતા વિવિધ પ્રોજેક્ટો અંગે કારીગરો પાસેથી માહિતી મેળવી હતી. વાતચીત દરમિયાન સ્થાનિક દુકાનધારકોએ કચ્છમાં થયેલા પ્રવાસનના વિકાસથી અનેક પરિવારોને રોજગારી મળી રહી છે તેમજ કચ્છી લોકકળાને પ્રોત્સાહન મળી રહ્યું હોવાનું જણાવ્યું હતું.ટેન્ટ સિટીમાં આવેલ ક્રાફ્ટ બજારની મુલાકાત બાદ રાજ્યપાલે કચ્છની ઓળખસમા સફેદરણમાં નજારો માણીને ધન્યતા અનુભવી હતી. રાજ્યપાલએ ઊંટગાડી પર બેસીને સફેદ રણની સહેલગાહ કરી હતી. કચ્છના સફેદરણમાં સૂર્યાસ્ત નિહાળી તેમણે અનોખો લ્હાવો લીધો હતો. વિવિધ પોઝ આપીને ફોટોગ્રાફી પણ કરાવી હતી. સફેદ રણની મુલાકાત દરમિયાન પ્રવાસીઓ તેમજ રાજકોટની શાળાના પ્રવાસી બાળકોએ પણ રાજ્યપાલ સાથે ફોટોગ્રાફીનો લ્હાવો લીધો હતો. સૂર્યાસ્ત નિહાળ્યા બાદ ખુલ્લા આકાશમાં વિવિધ કલાકારો દ્વારા પ્રસ્તુત સાંસ્કૃતિક કાર્યક્રમ નિહાળ્યા હતા. સફેદ રણની મુલાકાત દરમિયાન રાજ્યપાલની સાથે તેમના પરિજનો પણ જોડાયા હતા.કચ્છ જિલ્લાના ત્રણ દિવસના પ્રવાસે આવેલા માન. રાજ્યપાલ આચાર્ય દેવવ્રતજી આજે બપોરે ૧૨.૪૦ વાગ્યે ભુજ રેલવે સ્ટેશને આવી પહોંચ્યા હતા આ તકે વહિવટી તંત્ર દ્વારા સ્વાગત કરવામાં આવ્યું હતું. જિલ્લા કલેક્ટર પ્રવિણા ડી.કે. પુષ્પગુચ્છ આપી સ્વાગત કરવામાં આવ્યું હતું. તેમજ રેન્જ આઇ.જી. સુભાષ ત્રિવેદી, ડીડીઓ, પૂર્વ કચ્છ જિલ્લા પોલીસવડા અને અિાૃધક નિવાસી કલેક્ટર દ્વારા રાજ્યપાલને આવકારવામાં આવ્યા હતા. આ પ્રસંગે માન. રાજ્યપાલને રેલવે સ્ટેશન ખાતે ગાર્ડ ઓફ ઓનર પણ આપવામાં આવ્યું હતું.
